Konráð J. Brynjarsson

 
Sælir nú hlustendur góðir til sjávar og sveita. Ríf eg hér fimm daga þögn mína við dynjandi lófaklapp og fagnaðarlæti sem hóta niðurrifi heilu og hálfu hverfanna. Eg kann ekki alshugar að skýra hvurs vegna eg hef ekki bætt neinu við það bull sem hér er fyrir síðast liðna fimm daga, en eg er viss um að skýringin er til. Nú er eg orðinn allt of þreyttur til þess að skrifa nokkuð meir, eg er alveg að sof.jaldjfisil

skríbentar Konráð J. þegar klukkan slær 23:00

 
Páskadagur að kveldi kominn og eg mættur til vinnu enn og aftur. Ekki svo að segja að líf mitt snúist eingöngu um vinnuna, eg geri ýmislegt annað. Eg ferðast til vinnu, frá vinnu, útbý nesti fyrir vinnuna og sef á milli þess sem eg mæti til vinnu. Talandi um svefn. Eg svaf í góða níu tíma nú áðan, frá 07:30 í morgun til 16:30 nú seinnipartinn. Það er svo sem ekki í frásögu færandi, nema hvað að þessir níu tímar voru ákaflega verðskuldaðir og notadrjúgir, svo ekki sé nú minnst á nauðsin þeirra. Eg hafði nefnilega vakað í um það bil 21 og hálfan tíma fram til þess er eg lagðist til hvíldar í morgunn. En ástæða þessa vökukasts er náttúrulega mið margumrædda fermingarafmæli sem haldið var uppá á föstudaginn langa. Eg get með góðri samvisku sagt að allt hafi farið þokkalega vel fram, menn og konur áttu margar ágætar samræður og umræður um það sem á daga þess hefur drifið frá því það síðast hittist. Flestir hafa ákaflega lítið breyst, bæði í útliti sem og hegðun, en það verður ekki talið öllum til tekna. Vert er að taka það fram að meistarkokkurinn Jón, sem lengst af stýrði kjötborðinu í Nesbæ, meðan hann var og hét, töfraði fram indislega máltíð sem fór að öllu leiti ljúflega niður, allt frá humarsúpunni til núggatísins, með góðu stoppi hjá lambasteikinni og ekki spillt lágt verð ölsins. Þó að kveldið hafi farið vel fram í alla staði, þá er nú vart hægt að tala um það sem ákaflega eftirminnilegt, ef ekki væri fyrir hlut Kára hins fróða Viðarssonar og Jóhanns hins arma Sigurðssonar. En sá síðarnefndi varð æði argur og réðst á þann fyrrnefnda í æði miklu og greip um höfuð honum. Þóttust menn þar kenn tilburði til þess bragðs er heilaslettingur er kallaður og fellst í því að kreista höfuð andstæðingsins þar til heilinn slettist út um þau göt er leið er greiðust. En menn þurfa til að bera styrk á við vel rúman sveitamann til þess að ná þessu bragði og þó að Jóhann sé upp alinn í sveit, er eg hræddur um að löng og mögur ár á mölinni hafi burtu nomið mesta allan þann styrk er hann áður prýddi. Svo ber náttúrulega að nefna það til að halda réttlátu hlutleysi að Kári er maður höfuðharður með meiru enda eyddi hann mörgum stundum í að herða höfuð sitt í æsku, þá einna helst með því að berja því við stein. Svo má ekki gleyma hlut Snorra hins hrausta Þórðarsonar og Guðna hins gráa Guðmundssonar, en þeir eru fóstbræður Kára og þustu honum til aðstoðar eins og sönnum hetjum sæmir. Reyndist máttur þeirra þó einna best við það að forða Kára hinum óða ('fr' týndist í látunum) frá því að verða manns bani en segja menn að froða hafi ollið úr vitum hans og að augu hans hafi ranghvolfst af bræði einni saman. Vert er einnig frá því að greina að Kári greip heljartaki um háls hins arma og hélt honum þar frá sér. Komst Kári slysalaust frá átökum þessum nema að yrjóttur blettur byrtist á hægra kinnbeini hans, en reyndist hann vera tilkomin vegna hnés Guðna hins gráa sem hafði þar viðkomu í hamagangnum. Eigi fer frekari sögum af fangbrögðum þetta ágæta kveld.

En nú er sem sagt páskadagskveld og eg hef ekki enn fengið páskaegg. Mér reiknast til að þetta sé í fyrsta skipti eftir að eg komst til vits og ára, sem eg fæ ekki páskaegg og er það miður eg kem til með að gráta mig í svefn á morgun, en burt séð frá því þá er lífið ákaflega gott...

Konni B.(ullari)

skríbentar Konráð J. þegar klukkan slær 20:29

 
Mjólkurbúð Birgis, kaupmaður:Dabbi kóngur!

Jæja nú hef eg enn eina ferðina skotið mig í fótinn. Ekki fyrr búinn að frussa svolítið yfir þá bakkabræður Risann og Skallann fyrr en eg bara læt sjálfur lífið í Vefbókarheimum og læt ekki í mér heyra í heila 4!!!! daga. Það er nú kannski skiljanlegt, dagarnir, thja næturnar ætti ég víst að segja, eru ekki upp á marga fiska þessa stundina. Eg vinn, et og sef og ekkert annað, maður á sér MJÖG takmarkað líf í þeirri vinnu sem ég vinn, sérstaklega þar sem ég vinn bara á nóttunni. En nóg um það. Eg er að fara á fyllerí annað kveld. En þann 8. apríl sl. voru liðin TÍU segi og skrifa, 10 ár frá því að rúmlega fjörtíu falleg börn fædd árið 1979 voru fermd í Borgarneskirkju. Í tilefni þess ætla þessi börn, sem nú eru flest orðin að farlama gamalmennum, bundin við hjólastóla og göngugrindur, að hittast á morgun og skemmta sér ærlega saman. Eg á fastlega von á því að dagurinn verði vel heppnaður, enda standa fjórar röggsamar eðalstúlkur fast að baki hátíðarhöldunum, og voru þær ekki þektar af öðru en að vera fylgnar sér og skemmtilegar í alla staði. Planið er ótrúlega klassískt og einfalt, rölta um barnaskólann, skreppa í sund, eta góðan mat og detta svo ærlega í það. Einfalt, þægilegt, öruggt (c: og það bestavið þetta alltsaman er sú voðalega staðreynd að ég gleymdi að fara í ríkið!!!!! )c:

Það á að skjóta svona menn, að gleyma áfengiskaupum vitandi það fullvel að mjólkurbúð Birgis er ekki opin á hátíðis og tillidögum. Þrátt fyrir ítrekaðar tilraunir mínar í gær til þess að finna opna mjólkurbúð, þá varð ég að sætta mig við það, að Dabbi kóngur leyfir ekki mjólkursölu um hátíðir. Þetta er þvílík argasta hneysa og molbúaháttur að það hálfa væri hellingur. Það er ekki hægt í því nútíma samfélagi sem við búum í í dag, að fullorðið fólk geti ekki orðið sér úti um eylitla mjólkurlögg þó að það eigi að heita hátið. Eg man ekki betur en að sá maður sem er valdur að þessari hátið, sjálfur guðssonurinn hafi einmitt drukkið sína síðustu skál og etið sína síðustu máltíð á þessari jörð einmitt á þessum degi (skýrdegi) og eg man ekki til þess að bannað hafi verið að kaupa öl á þessum degi þá. Eg get nú ekki sagt annað en að eg er orðinn töluvert leiður á allri þessari forsjárhyggju sem ríður húsum ekki við einteyming á okkar ágæta skeri. Að vísu hefur margt verið lagað í þeim efnum hin síðari ár, en betur má ef duga skal. Eg fæ ekki séð annað en að rétt sé að færa áfengissölu frá Dabba kóngi og félögum og láta þá bónusfeðga og Jón Ólafsson og aðra í þeirra stétt sjá alfarið um þetta. Eg er þess fullviss að það verður til hagsbóta, ja allavega fyrir mig ef eg gleymi aftur að fara í ríkið daginn fyrir skýrdag. Því eg hefði sem best getað keypt mér mínar áfengu nauðþurftir í Nóatúni, en ég átti einmitt leið í þá verslun í gærmorgunn. Nú eða þá 10-11 eða einhvurja aðra þá mjólkurbúð sem opin var þá. Nb. þá voru þær flestar opnar, ef ekki allar, nema mjólkurbúð Birgis, sem Dabbi kóngur heimtar að loki á öllum rauðum dögum dagatalsins. Eg segi nú bara eins og Soffía frænka: "Ja fussum svei!"

Konni B.(ullari)

skríbentar Konráð J. þegar klukkan slær 01:29

 
Gott er að sjá að menn eru á lífi. Fratlýsingum mínum á hina mætu sveina, Risann og Skallann, var tekið með þeim hætti er ég bjóst við. Öllu fratið vísað heim til föðurhúsanna og tek ég við því og kokgleypi sem reðursuga væri eg hin mesta. Lítið gleður einfaldan eru orð sem lýsa ágætlega deginum í dag. Svaf langt fram yfir öll velsæmismörk, dreif mig svo í skúringar, gleypti í mig nokkrar brauðsneiðar og disk af Cheeriosi og hélt af stað í mínum heittelskaða strætó númer 6 í vinnuna. Og hér sit ég og pikka þessi fáu orð. Það er ljúft að getað verið á netinu í vinnunni, án þess að það hindri starfið á nokkurn hátt, bara ljúft! Passa mig á því að eyða ekki of löngum tíma þar samt (þ.e.a.s. á netinu) maður verður svo heiladauður. Það verður sjálfsagt ekki mikið sem ég hef fram að færa næstu vikuna, þar sem ég sef allan daginn og vinn alla nóttina, en við sjáum til, kannski dettur mér eitthvað sniðugt í hug.

Þokkalega gott fólk, læt þetta duga og kveð að sinni,

Konni B.(ullari)

skríbentar Konráð J. þegar klukkan slær 22:38

 
Enn ein dagur að kveldi kominn og ég sit hér við tölvuapparatið og pikka. Ég var að fá bréf frá vinkonu minni á Ítalíu, henni Eddu Maríu, hún er hress að vanda. Ég hóf daginn á dómgæslu enn of aftur. Dæmdi úrslitaleikinn í 9. flokki karla. Þar áttust við Njarðvík og Fjölnir og höfðu Njarðvíkingar sigur. Sat svo og stýrði tíma í leiknum á eftir, 11. flokkur karla, Fjölnir-ÍR. Fjölnir vann í spennandi og tilfingaþrungnum leik, var hrikalega skemmtilegur á að horfa, ef frá eru taldar síðustu 2 mínúturnar sem fóru að mestu leiti fram á vítalínunni.

Við Guðni sendum okkar fyrstu fréttir inn á KKDÍ.is, og voru þær að sjálfsögðu um yfirtöku okkar þar (c: Já við skelltum okkur einnig á T(hank).G(od).I(t's). Friday. Þar fást nokkuð góðir hamborgarar, en ég mæli með því að þangað fari fólk með GALtóman maga og nóg af seðlum, því maturinn þarna er gríðarlega girnilegur en að sama skapi nokkuð dýr. Gleymdi því, fór í bíó með Kára og Gunni í gær. Sáum nýjustu afurð Jackie Chan, Shanghai Knights. Það er langt síðan að ég hef hlegið jafn mikið að bíómynd og ég mæli hyklaust með henni fyrir alla kvikmyndahúsafara. Það spillir ekki fyrir að hún er sýnd í BESTA bíóhúsi landsins Smárabíó, ég tek það fram ég er ekki á launum hjá þeim, ég kann bara vel að meta að gert sé ráð fyrir löngum bífum og breiðum botnum. Ég verð að lýsa frati á þá bakkabræður Risann og Skallann, þeir hafa ekkert skrifað nýtt frá því ég las síðast, þykir mér sem þeir séu farnir að linast.

Þokkalega gott fólk, læt þetta duga og kveð að sinni,

Konni B.(ullari)

skríbentar Konráð J. þegar klukkan slær 19:36

 
Tekið er nokkuð að halla að kveldi og ég er ekki frá því að tekið sé eylítið að rökkva utan við gluggan minn. Það stafar væntanlega af því að sólin sem skapað hefur rjómablíðu í allan liðlangan dag (og dágóða stund úr gærdeginum einnig), hefur bruggðið sér á bak við ský til að skipta um föt. Ja allavega eitthvað sem ekki þykir holt fyrir okkur jarðlinga að sjá. Dagurinn var tekinn snemma og vorum við félagarnir, Guðni og ég, komnir á Sukkbílnum ofan í Laugardal töluvert fyrir níu í morgunn. Þar flautuðum við sitthvorn leikin í fjegurra liða úrslitum 10. flokks kvenna, við ágæta afspurn, þó er ekki víst að allir hafi farið sáttir úr húsi. Það er skemmst frá því að segja að Haukar rótburstuðu Kormáksstúlkur frá Hvammstanga í fyrri leiknum og get ég ekki ímyndað mér að gaman hafi verið á að horfa. En í seinni leiknum þá áttust við Skallagrímsstúlkur úr Borgarnesi og ungsnótir frá Keflavík. Ekki var nú stigamergðinni fyrir að fara í þessum leik, þekkjast þess fjölmörg dæmi að handboltaleikir kvenna hafi endað með hærri tölum, en svo fór þó að lokum að Bítlastúlkurnar höfðu sigur og mæta þær því Haukum á morgun í úrslitaleik. Þegar þessum leikjum var lokið tók við leikur nágrannana Keflavíkur og Njarðvíkur í unglingaflokki karla. Var það hörð rimma og mikil sem endaði með eins stigs sigri Njarðvíkinga 101-100 í framlengingu og er óhætt að fullyrða að Keflvíkingar gengu lítt sáttir frá velli. Maður hittir ekki alltaf á það.

Eftir þessa dvöl í höllinni þá dreif ég mig heim og fékk mér bað. Vildi þá svo til að ekki var hræða í húsinu, sem er afar sjaldgæft að gerist á neðri hæðinni á Tunguveginum. Ég fékk mér vel útilátið og verðskuldað þrifabað, skóf höfuðleðrið og hélt í leiðangur. Mig vanhagaði nefnilega um svokallaða skrifanlega geisladiska. Og er ég nú að brúka þá í gríð og erg, er að útbúa mér eintök af stórmyndinni Army of Darkness og teiknimyndinni Wyrd sisters sem er gerð eftir samnefndri Diskheims bók eftir Terry Pratchett. Endalaust tuð um ekkert, ég læt hér staðar numið, ég þarf að skúra það er mín vika núna.

Þokkalega gott fólk, læt þetta duga og hveð að sinni,

Konni B.(ullari)

skríbentar Konráð J. þegar klukkan slær 17:03

 
Dagurinn er að kveldi kominn og ég kominn heim að Tunguvegi 18. Hér er margt góðra mann og kvenna. Gunnur heitir stúlka ein ofan af Akranesi og utan af mýrum ættuð. Hún er í vísiteringu hjá honum Kára sínum, en kunnugir segja að þeim sé eigi kallt um nætur og ef svo ólíklega vill til þá verði þeim ekki skotaskuld úr því að hlýja hvort öðru. Hér er einnig staddur Aðalsteinn nokkur ásamt sínu viðhengi og ektakvinnu henni Sollu. Þau sitja nú með fyrrnefndum Kára, Guðna og Valda, meðleigjendum mínum og spila Risk, herkænskuspilið ógurlega.

Ég varð þeirrar ánægju aðnjótandi að vera að vinna í dag. Ég vinn í 101 Reykjavík og tek gjarnan strætó í vinnuna. Þetta væri nú ekki í frásögu færandi nema hvað að þegar ég stíg út úr sexunni minni heittelskuðu niðri á Lækjartorgi, þá mætir mér flóð af fílum (fíllinn hún Nellý skillst mér), býflugum, púkum og öðrum furðuverum. Ég þurfti nú ekki að velkjast lengi í vafa um hvað hér var á ferðinni, því ég sá að hvert og eitt einast kvekendi var með áfengi um hönd. Þá kom aðeins eitt til greina, framhaldsskóla útskriftarnemar að dimmitera. Þ.e. að gera sig að fífli, uppáklæddur sem furðuverk, peð ölvaður niðri í bæ. Það útskýrði líka hvers vegna Hlemmur var fullur af konum á upplut og peysufötum, og körlum í kjól og hvítt með pípuhatt. Þar voru víst nemendur Verzló (held ég alveg örugglega, gæti verið MR) á ferð. Svo þegar í vinnuna var komið þá heyri ég í fréttum að þrír nemendur MS væru í haldi lögreglu eftir að hafa "veist að", eins og það er kallað, búðareiganda á Laugarvegi. Ég get nú ekki orða bundist, geta menn nú ekki dimmiterað án þess að lenda í slagsmálum og höggva mann og annann, hvað þá saklausa verslunareigendur sem hafa það eitt til saka unnið að henda draugfullum furðudýrum á dyr. Ég reyndar get mér þess til að það hafi verið orsök málsins, ég veit það ekki fyrir víst. Eitthvað var minnst á að nemendur MH hefðu gert einhvern skandal líka, en ég heyrði það ekki endurtekið í síðari fréttatímum svo að varla getur það hafa verið alvarlegt. Ég geri fastlega ráð fyrir því að þeir sem hafa lifað af daginn, komi til með að skemmta sér fram eftir nóttu í miðbænum og segja mér kunnugir að þar gæti orðið þónokkuð fjör. Ég dreg það ekki í efa, en þar sem ég þarf að dæma undanúrslitaleik í 10. flokki kvenna í köru í fyrramálið klukkan 9:00, þá held ég að ég verði bara heima stilltur og prúður.

Þokkalega gott fólk, ég læt þetta duga og kveð að sinni,

Konni B.(ullari)

skríbentar Konráð J. þegar klukkan slær 21:07

 
Jæja góðir hálsar þá er enn einn snillingurinn mættur í Vefbókarheima, Jóhann Waage öðru nafni Skallinn. Ekki eru til mikið málskemmtilegri menn en Skallinn á okkar ágæta skeri og fer hann ferskum og hnittnum höndum um ástkæra ylhýra svo menn þykjast vart kenna að þar fari íslenska. En Skallinn er hagur maður í huga og hönd svo einsdæmi gæti kallast, Bullarinn tekur að sér hér með að kenna honum að setja inn krækjur og annað slíkt við fyrsta tækifæri.

skríbentar Konráð J. þegar klukkan slær 18:18

 
Jæja þá held ég að þetta sé loksins að verða tilbúið hjá mér. Ég er nú búinn að vera að brasa við þessa blessuðu síðu í á þriðja tíma og ég held að ég sé orðinn nokkuð sáttur við útlit hennar í bili. Mér hefur reyndar ekki tekist að fá íslenska stafi til að virka í html kóðanum í 'Template' og ef einhver sem hér á leið um hefur hugmynd um hvernig ég fæ þá til að virka, þá má sá hinn sami gjarnan senda mér póst og segja mér hvernig það er gert. Tölvupósfang mitt er konnib@hotmail.com, ég þigg all þá hjálp sem ég get fengið í þessum efnum.

Ég er búinn að vera að lesa Discworld bækurnar eftir Terry Pratchett undanfarna mánuði, ég hef það fyrir reglu nú orðið að kaupa mér þær bækur sem ég er að lesa og þurfti þess vegna að fjárfesta í nýrri bókahillu nú uppúr áramótum. Ég á orðið 26 bækur af þeim 27 sem gerast í Diskheimum. Þarna er aukaefni ekki talið með. Ég fæ hreinlega ekki nóg af þessari yndislegu vitleysu. Þessar bækur hafa ekki verið þýddar á okkar ástkæra ylhýra, frekar en flest allur annar fjarstæðuskáldskapur, með einni undantekningu, því tölvugrúskarinn, kerfisstjórinn, kennarinn og dómarinn Gunnar Freyr Steinsson hefur þýtt smásögu eftir Pratchett sem hæt er að finna á L-Space.

Núg er nóg komið held ég bara, ég ætla að fá mér yndislega norska skyndiflatböku sem Europris selur á spottprís og fara svo í háttinn. "Búna nótta, fara hátta"

skríbentar Konráð J. þegar klukkan slær 02:09

 
Jæja góðir hálsar...ég er mættur. Hefst nú nýtt skeið í netnotkun minni því ég mun nú gera heiðarlega tilraun til þess að halda úti Vefbók (Weblog). Ég nýt þess að sofa, og fátt veitir mér meiri ánægju í lífinu en svefn. (Með eðlilegum undantekningum eins og matur og ríð... ég meina samfarir(innri ritskoðun)) Ég held þegar úti einni heimasíðu, þar sem ég birti skáldskap minn í bundnu og óbundnu máli. Kíkið endilega í heimsókn.

Ég eyddi nokkrum tímum nú í kveld heima hjá Ragga risa, þar sem ég var að reyna að koma bloggsíðunni hans í nothæft form. Og viti menn mér tókst það bara ótrúlega vel (c: Ég kom fyrir þar nokkrum tenglum og gestabók og það sem meira er þá tókst mér að kenna drengnum að bæta við eigin viðbótum, ég á skilið gott klapp á bakið fyrir það. Ég fékk reyndar gott klapp hjá Ragga, ég fékk hrós dagsins á síðunni hans, ég kann honum góðar þakkir fyrir. Það má segja að þess vegna sitji ég hér og hripi þessi orð, því að ég veiktist af einhverri bakteríu við þetta fikt mitt í síðu risans, en ég er að hugsa um að lofa ekki að ég endist hérna, þó er aldrei að vita.



skríbentar Konráð J. þegar klukkan slær 00:02