Konráð J. Brynjarsson

 
Jæja góðir hálsar, ég lýsi því hér með yfir að sumarfríi mínu er formlega lokið. Ég er mættur til leiks á ný, eftir leið sem var löng og dimm eins og Hallbjörn segir í lagi sínu Kúreki norðursins. Mætti til vinnu í fyrradag eftir ágætt frí, fimm og hálf vika. Reyndar fóru nú ekki nema þrjár og hálf í eiginlegt frí (þar af ein í hringferð okkar Risans) en hinar tvær fóru í vinnu. Ég er nefnilega alveg ómissandi á vissum stöðum, þá einna helst í Loftorku en þar brá ég mér í mitt gamla starf sem Aðstoðar Innkaupastjóri (sem líka mætti útleggja sem lagertittur) svona rétt á meðan Ninni frændi brá sér í sumarfrí. Það var ágætt að koma aftur á fornar slóðir, sérstaklega í matinn hjá ömmu (þar borðaði ég í hverju hádegi) en ég hef einna helst áhyggjur af því að vambarmál mitt hafi aukist ískiggilega við það að vera í fæði hjá ömmu minni elskulegri. Það stendur allt til bóta, því líkamsrækt og spikskekingar hafa verið hafnar aftur eftir drjúgt hlé.

Ýmislegt hefur gerst í fríinu. Eitt það markverðasta er að langþráður "draumur" foreldra minna hefur orðið að veruleika. Borgabúar hafa hafið innreið sína á veraldarvefinn. Ég mæli eindregið með fréttaskýringum móður minnar, sem eru að íslenskum sveitasið, stútfullar af nýjasta slúðrinu úr tungunum. Svo er Massinn öflugur á forsíðunni...

Eins og flestir á suðvesturlandi fundu, þá reið jarðskjálfti yfir í gærnótt. Það var frekar súrrealískt að standa kyrr innandyra en sveiflast samt eins og pendúll til og frá. Því miður var ég í vinnunni en ekki heima í rúmi eins og þegar seinni suðurlandsskjálftinn reið yfir. Það var ósköp þægilegt að láta skjálftann vagga sér í svefn. En eins súrrealískt eins og það var að upplifa skjálftann þá komst það ekki í hálfkvist við steypuframkvæmdir Ríkisútvarpsins. Ég kveikti á útvarpinu mjög fljótlega eftir skjálftann og var þá verið að spila leiðbeiningar til fólks um hvernig bregðast skuli við í jarðhræringum sem þessum. Ég var nú ekki viss til hvers var verið að því en komst svo að því í dag að þetta er hluti af viðbragsáætlun Almannavarnardeildar Ríkislögreglustjóra og RUV. Svo sem ekkert athugavert við það, né heldur við það að stuttu síðar fóru fréttamenn að flytja fólki fréttir af því sem gerst hafði, hvar, hvenær o.s.frv. En svona hálftíma eftir skjálftann þá voru flest aðalatriðin orðin ljós og lítið við að bæta, svo að ég bjóst við að ekki yrði um frekar fréttir að ræða, í það minnsta í bili. En sitthvað annað kom á daginn. Fréttamennirnir hafa greinilega verið orðnir langþreyttir á gúrkunni og ætluðu sér að blóðmjólka þessa belju á meðan hún gæfi. Ýmsir furðufuglar voru dregnir fram á sjónarsviðið og sögðu farir sína missléttar eftir skjálftann, sem þó gerði lítið meira en að hrista aðeins upp í mannskapnum og skella munum á gólf í Krísuvíkurskóla. Sem vel á minnst var svo gott sem ofan á upptökum skjálftans og því kannski ekki undarlegt að þar léki allt á reiðiskjálfi og drasl flygi um allt hús. En það var ekki nóg fyrir andófsmenn gúrkunnar í Efstaleitinu, því að þeir grófu upp móðursjúka húsmóður í Kópavoginum, kjarnyrta kerlingu í Hafnarfirði ásamt fleirum sem ég ekki hafði geð í að muna hvaðan voru. Þess á milli var Ragnar skjálfti virkjaður til útskýringa og upplýsinga sem í sjálfu sér er ekki svo slæmt, nema hvað fréttamennirnir tuggðu allt sem hann sagði þrisvar áfram og fjórum sinnum afturábak. Að lokum voru þau farinn að kenna fólki að nota síðu Veðurstofunnar ef ske kynni að einhver hefði misst af einhverju. En hámarkið á "fréttaafrekinu" í gær var þegar fréttamennirnir drógu löggu í Grindavík upp úr rúminu til að fá að vita stöðu mála þar. Það var tæplega að manngreyið vissi hvað hann hét eða hvað hefði skeð, hvað þá að hann vissi nokkuð um hvernig restin af bæjarbúum hefði orðið við skjálftann. Ekki er öll vitleysan eins, ég segi nú ekki annað.

Fleira ekki gert, fundi slitið

skríbentar Konráð J. þegar klukkan slær 05:37