Konráð J. Brynjarsson

 
"Play the best song in the world! or I'll eat your souls" gólar Jack Black og vinur hans Kyle sem saman skipa hljómsveitina Tenacious D. En ég er ekki alveg með slíkar ógnarkröfur heldur er bara nokkuð slakur á kantinum, u.þ.b. að fara að sofa, enda klukkan orðin rúmlega tíu og löngu kominn háttatími fyrir litla mömmukúta eins og mig.

Ég skellti mér (bæði í gær og aftur í kvöld) í hið nýja musteri lögulegs líkama, sem nefnt hefur verið Laugar. Ég get ekki annað sagt en að þessi stöð taki hinni gömlu í Felsmúlanum fram að öllu leiti. Allt miklu stærra (reyndar hálfklárað eða a.m.k ýmiss frágangur eftir), enginn bið ennþá eftir hlaupabretti, nokkuð sem plagaði mann mikið á vissum álagstímum í Felsmúlanum. Svo ekki sé minnst á hita í gólfi búningsherbergja, frábærra sturta og svo mætti lengi telja. Ég hef að vísu alveg látið öll víxlböð, saltböð, regndropaböð og steinaböð eiga sig, enda kostar slíkt víst sitthvað meira en það að fá "bara" aðgang að tækjasal. Get ekki annað sagt en að þetta fari ágætlega af stað.

Það gerðust stórtíðindi í dag. Viðarsson Kári sendi mér (ásamt fleirum) tölvupóst, þar sem hann tilkynnti (mjög stoltur) um opnun vefbókar sinnar, sem staðsett er á slóðinni: http://karividda.blogspot.com (og ég hefi þegar bætti í tenglalista vorn undir Viðarsson Kári). Ég býst fastlega við því að þar fari Kári á kostum í þjóðfélagslegri ádeilu sem borinn er fram með kómískri íroníu af hæsta gæðaflokki, og svo er aldrei að vita nema ein og ein staka slæðist með svona til bragðbóta. Ég býst við stórum hlutum.

Mér þykir að mér vegið,
maklegt er það þó.
Þó að mér hátt sé hlegið,
mér hvorki' er um né ó.

Orti þessa stöku vegna umræðna hjá Mr. Jones. En eftir pistil hans frá því í gær, og uppljóstranir þess efnis (í kommentum við þann pistil) að ég (og fleiri vaskir MENN) vitjum hans yðulega í draumi, blautum, erótískum draumi, þar sem við komum fyrir sem hórklæddir kvennmenn. Ég skal segja ykkur það, að ég veit hreinlega ekki hvernig ég á að bregðast við þessum uppljóstrunum. Og veit raunar ekki hvort er verra, að ég vekji kynferðislegar kendir hjá karlmanni eða að hann sjái mig sem kvennmann! Hvoru tveggja vekur hjá mér ugg og á ugglaust eftir að valda mér svefnleysi, einhverntíman þegar ég er ekki jafn þreyttur og nú. Þó að ég búi yfir ýmsum "kostum" sem gjarnan eru sagðir kvennlegir (svo sem eins og ótvíræðir hæfileikar til símablaðurs) þá hef ég eigi heyrt því fleygt áður að ég líti út sem kvennmaður, eða sé kvennlega vaxinn (thja spurning um júllurnar, en þær slaga nú vart upp í fermingarstærð, hvað þá meira og eru þar að auki á hröðu undanhaldi). En hvað sem kynórum Mr. Jones líður þá verð ég því miður að hryggja hann með því að mínar erótísku draumfarir snúast ekki um hann, né nokkurn annan karlmann! (Það er varla að ég sjálfur komi þar við sögu hvað þá einhverjir aðrir)

Fleira ekki gjört, fundi slitið.

skríbentar Konráð J. þegar klukkan slær 22:29